تمرينات
(الجزء ألاول)

دليلك للأشتراك في بطولة

الأربعاء , 05 فبراير 2020 03:14 م

لو انت عايز تشارك في بطولة تأكد أن أسلوب ونظام حياتك هيتغير تماما وكل ما اقترب موعد البطولة نظامك هيختلف اكتر الى ان تصل لمرحله انك بتحسب: شربت مياه قد ايه، نمت كام ساعه، اكلت ايه، تاكل تاني بعد قد ايه، كام جرام بروتين، كام جرام كارب وكل ده ولسه ماتكلمناش عن المكملات والهرمون.

الموضوع مش صعب، لكن الموضوع محتاج انضباط ذهني وبدني عالي جدا، وطبعا مبلغ كويس علشان تقدر تجهز نفسك للمشاركة. الفرق هو ان النزول للجيم أصبح مهنة وليس هواية. 

حدد الفئة

اختيار الفئة اللي هتشارك فيها اهم خطوه في الموضوع كله. تحديد الفئة يرجع لمستواك وجيناتك الوراثيه. ممكن نبسط الموضوع اكتر، بطولات كمال الاجسام المحلية والدولية تصنف لاعبي كمال الاجسام الى 3 فئات، كل فئة تخضع لشروط ومعايير مختلفة عن الأخرى.

الفيزيك: تعتبر فئة جديدة في رياضة كمال الأجسام، تم إدخالها بشكل رسمي عام 2012، وهي الفئه الاكثر انتشار في وقتنا الحالي. تركيز الحكام بيكون على اللياقة البدنية، التناسق، السميتريه والشكل الجمالي وليس على أساس الحجم العضلي والضخامه.

الصفات الاساسية الواجب توافرها في لاعب الفيزيك هو الوسط الصغير والظهر والكتف العريض، نسبة الدهون في الجسم لا تزيد عن 5% عشان تساعد في بروز العضلات والاهم هو الجزء السفلي من الجسم (الرجل) ليس له أولوية في التحكيم، والعرض على المسرح بيكون شورت بطول الركبة.

روتين العرض يختلف عن الفئات الاخرى، العرض هنا مش العرض التقليدي (اوضاع البودي بلدنج)، ولكن العرض بيكون للشكل العام للبنية من غير اتخاذ وضعيات ثابتة لابراز العضلات.

الكلاسيك فيزيك: هي الفئة الأصغر في أولمبيا، وتم تقديمها لأول مرة على مسرح أولمبيا في عام 2016، واهم صفات المشاركين هو التناسق العضلي، عضلات رجل قويه وحجم عضلي لكن  اصغر من حجم لاعبي كمال الاجسام واكبر من حجم لاعبي الفيزيك. الجزء السفلي من الجسم ليه دور كبير هنا لأن التحكيم بيكون على الجسم كله.

سنه بعد سنه اصبحت فئة الكلاسيك فيزيك ليها شعبيه كبيرة و مستوى المنافسة بيعلي فيها كل سنة.

روتين العرض هنا مشابهة لروتين عرض فئة البودي بلدنج:

1- Front Double Biceps

2- Side Chest

3- Back Double Biceps

4- Abdominals and thighs

5- Favorite Classic Pose-no most muscular 

بودي بيلدنج: وصلنا تقريبا عند اشهر واصعب فئه، الدبابات البشريه بتتنافس هنا. لو اختيارك هو فئة البودي بلدنج فأنته محتاج تكون متكامل، يعني: جينات، سيمترية، بروز عضلي، رجل قويه والأهم هو حجم عضلي وضخامة  مع الحفاظ على نسبة دهون منخفضة.

روتين العرض هنا هو الروتين المعتاد من زمان:

Front Double Biceps -1 

Front Lat Spread -2

Side Chest -3

Back Double Biceps -4

Back Lat Spread -5

Side Triceps -6

Abdominals and Thighs -7

اختار بطولة

خلاص قررت هتشارك في أي فئة، دلوقت لازم تختار الاشتراك في بطولة يكون ميعادها مناسب ليك من حيث التجهيز وتحقق لك أهدافك، أي كان هدفك مادي او احترافي او الاتنين مع بعض، واكيد ده الاحسن. لكن هذا النوع من البطولات مكلف نوعا ما نظرا لانه بيحتاج تسافر في اغلب الاوقات، كمان مستوي المنافسة بيكون عالي، بالعربي كده لازم يكون معاك مبلغ محترم ومجهز نفسك على اعلي مستوي ك فورمة (حجم وكثافة عضلية، ناشف، سيمتري، جينات وراثية حلوه) وعندك الوقت الكافي للتجهيز والاستعداد للبطوله.